阿爸阿姆个身教

從細屋家个身教

回想己家个生涯，除了受醫界前輩个身教影響盡深以外，阿爸阿姆勤勞个身教最重要。吾(ngai)無(mo)才能，不過一生盡認真勤勞，到今還繼續煞猛打拼。阿爸係小鎮个開業醫生﹐該時代个地方醫師，住家同(lau；tung)診所共下﹐不分晝夜同週末。雖係醫生家庭出身﹐屋家從來無豐足過。附近阿爸阿姆兩邊个親戚盡多，愛靠阿爸騰手个家人又多，無像其他醫生屋家有鋼琴或奢侈品﹐盡少去餐館吃飯。從細就養成勤勞節儉个習慣﹐哩係阿爸阿姆个身教。從細到今，就係已經退休，還共樣受哩身教影響，希望吾个子女也共樣繼續下去。

從細逐(dak；每)年冬天愛到鎮郊外，因為天冷不能種禾个田騰手種菜。讀大學个寒暑假轉屋家，常還愛去離屋家五、六公里外个果園做工。屋家任何个雜工也共樣。還盡記得有一擺騰手泥水師傅﹐路過个人還同泥水師傅講﹐「你知你哩細工係以後台大醫學院畢業个大醫師」。雖然無佇（du；在）阿爸个診所騰手過﹐但幾年耳孔聽到目珠看到﹐阿爸對吾个行醫身教一定留下盡多个影響。

身教用到求學、受訓同職業上

以後不管讀書、研究、教學、看病人、寫文章或其他工作，吾一向用阿爸阿姆身教个「勤能補拙」。小學生、中學生時全勤，大學生時可能也無請過假。較(ka)後生時，佇實驗室做研究，常常做到暗晡頭，有時到半夜。做住院醫師，有兜醫師常常請病假，吾5年住院醫師，請過个病假，全部加起來，無超過幾日。受訓時認真工作，想來係阿爸阿姆同台灣教授个身教影響。

從細阿爸阿姆个「勤能補拙」身教外，以後到美國个各種訓練同工作，又學習到美國教授對文獻同數據个注重，要求增進己家个知識基礎，也訓練或感染佢兜有評判性个思考方式。

實驗室研究難有進展，最主要係己家天份差，吾雖盡煞猛工作，到尾只能寫兜小論文，不能有成就。吾个研究其實一點創意也無，講起來不過只為昇等來做來寫个論文，終難有好東西，放棄實驗室研究。以後繼續佇學術醫學界做臨床工作同教學，無參加醫學中心个研究計畫，同主任講因為醫院無人手騰做。

台灣醫界同客家个歷史文化

實在講，可能吾已經係老油條，以前寫論文比別人多盡多，又早早昇等到有終身職(tenure)，唔驚無寫論文學校醫院會開除吾。用以前實驗室做研究个精力，改做探討台灣歷史文化，尤其有關台灣醫界同客家有關个題材。同鄉、朋友或同學常笑講吾个專科已經係「台灣科」，唔係小兒科或血液科。

己家个生涯，在學術性个醫學研究尤其實驗室研究，無成就，不過可能係「塞翁失馬」或「失之東隅收之桑榆」。對台灣个歷史文化、台灣醫界人文同客家有關个課題反較深入探討，己家也認為較有收獲。探討醫學人文或歷史文化，尋文獻愛認真，評判性个思考同也共樣重要。就像吾一向從事个學術醫學，共樣認真去尋文獻尤其尋原始文獻，多多思考。不管係醫學或歷史文化，道理共樣。

幾擺雜誌編輯、讀者或演講个聽眾，講吾尋文獻个程度「嘆為觀止」，或有特別功能，無麼个，勤勞tin-tin(而已)。尋文獻愛下功夫愛勤勞，email還沒普遍个時代，吾用手寫寄去或傳真去各地个信可能上千封以上。以後用email寫得又加多，想想最主要係來自阿爸阿姆同師長个勤勞身教。

身教影響个係故事

用一細故事來談個人受阿爸身教个影響，幾十年後正明顯表現出來。幾年前去參加在舊金山舉辦个校友會，聽韓良誠教授講一病例。佢講一庄下人有貧血，尋唔到原因，胃鏡檢查無看到潰瘍或任何可懷疑會出血个病變。再去尋另外一醫生，又講愛安排再一擺个胃鏡檢查，當病人問醫生有必要再做一擺無時，該醫生還態度盡壞同病人講「你到底愛唔愛命」。後來病人尋韓醫師，佢只問病史、身體檢查同大便檢查，就診斷出來係鉤蟲病引起个貧血。

當韓教授報告哩病例還沒(mang)講忒，吾就猜（ton）到診斷。頂高講到吾對阿爸个診所從來無騰手過，有擺轉屋家經過阿爸个診所，阿爸喊吾看顯微鏡。一看就知道有盡多蟲卵，鉤蟲个蟲卵。阿爸無講麼个，指吾看該病人，講係該病人个大便。該病人面色有兜白，想來有貧血，該時代小鎮根本無檢驗所。聽韓醫師報告時，突然間約四十零年前个事情出現吾个腦中，哩四十零年前个身教，因為己家生涯，四十零年後正出現。

看過宋瑞樓同韓良誠兩教授文章或自傳，提到佢兜个父親看病人唔係靠儀器檢查或實驗室檢驗，愛靠病人。盡記得宋教授從前上課同迴診時，一再強調問肚子痛時，愛問清楚，檢查身體也愛詳細，唔係教學生做各種檢驗或檢查，愛多問病史同身體檢查，佢兜講哩兜多少係源自父親个身教，吾想吾也共樣。

結語

吾一生主要做小兒科醫生，各種訓練、行醫、研究或教學中，訓練出尋文獻同評判性思考个功夫，以後就用來對歷史文化探討。吾一向「逆來順受」，退休後反較會想己家个生涯。身教對吾生涯扮重要个角色，阿爸阿姆同良師典範多，吾應該感謝父母親同所有良師个教導。