客家話辭典樣般寫<細-o-仔> 介<o>字?
--順便介紹目前有介客家話辭典 

(用教會白話字寫四縣腔/用通用拼音寫海陸腔)
朱真一 (Chu, Chin-yit/Zhu, Zhin-rhit)

表弟來信問ngai(我)到底客家話<細-o-仔(小孩子)> 介(的)漢字愛樣般(怎樣)寫？佢(他) 講佢看到幾條客家歌，歌詞寫做<小蚵仔> ，又有註解講<小蚵仔＝小孩子>。Ngai回答佢，客家人祖先 tai/dai(住)山區，離海遠，<蚵仔> m(不)應該係客家文化會用介字，故所客家語言中應該mo(沒)< 小蚵仔> 哩( 這)漢字介名詞。<細-o-仔> 介<o> 應該m係可以食介海產<蚵> 。去查最近出版介客家話辭(詞/字)典。Ngai 發現有盡(很)生趣介幾點，佇(在)哩來向大家請教。順便介紹目前有介客家話辭(詞/字)典。

手上有約二十本各種客家話辭典，最近十過年台灣出版介幾本全有提到，全部用<孲>字，來寫<o>，故所大部分用<細孲仔>。連香港最近出版劉鎮發主編介《拼音客家字彙》(1997；香港，香港中文大學出版)，也有<孲>字。

腳下係台灣出版幾本有<孲>字介辭典。哩兜新出版介辭典除了第6本，一般書店或客家介雜誌社、電台、出版社，應該可以買得到。劉鎮發頭擺佇台灣工作過，ngai寫信e寄錢去香港中文大學買，台灣介書店可能有。佢介字典可能有新版，有CD版，可能網路上也有。

1) 徐兆泉介《台灣客家話辭典》(2001；台北市，南天書局出版)。
2) 劉丁橫介《客家語文有聲字典》(2002；台北縣新店，彭氏客家文史工作室出版)。
3) 楊政男、徐清明、龔萬灶、宋聰正編介《客語字音詞典》(1998；台北市，台灣書店出版)。
4) 彭德修介《客家話發音字典》(1996；台北市，南天書局出版)。
5) 中原週刊社編介《客家話辭彙》(1992；苗栗市，中原週刊社出版)。
6) 詹益雲介《海陸腔客家字典》(1998；新竹芎林，中華客家台灣文化研究會出版)。

但是，去尋台灣舊兜(些)介辭典，腳下幾本盡難買到，ngai 去圖書館正(才)尋到。對<o> lau(跟) <nga> 兩字，mo漢字或mo 共樣介寫法，列出佇腳下：
1) 楊時逢介《台灣桃園客家方言》(1957；台北市，中央研究院歷史語言研究所出版)。哩本<o>就用<阿>，<nga> 用<伢>，故所列出<阿伢子>，註解講係<嬰兒> 。 2) 劉添珍介《常用客話字典》(1992；台北市，自立晚報出版)。Mo哩兩字，可能字典細本，收介字少。編者以後用劉丁橫介名2002年出版介新字典就有(請看上第二條)。 　
3) 滿思謙等編介《英客字典；English-Hakka Dictionary》(1958；台北市，光啟社出版)。佇Children，Infant 下mo 提到用<細-o-仔>或<o-nga>。

戰前出版介客家話字典，台灣目前有影印本，大部份係
<南天書局>影印，佇<南天書局>或其他有賣台灣書介大書店可以買得到。
1) 日本時代出版介像管向榮主編介《廣東語典》(1930；台灣總督府警察協會出版)mo尋到。
2) MacIver/Mackenzie主編介《客英字典；A Chinese-English Dictionary, Hakka-Dialect》(1926；上海Prebyterian Mission Press出版) 。哩本<o>項下，mo 提到有漢字。但是佇<nga>下有用<阿>來寫<o-nga-e>介<o>，用<孲>來寫<nga>，同時另有一字用<牙+子>(<牙>在左，<子>在右)，lau最近台灣字典用<>(<子>在左，<牙>在右)不同，註解講 children with baby teeth。
3) Ch. Rey主編介《客法字典；Dictionaire Chinois-Francais, Dialecte Hac-Ka》(1926；香港一教會出版) 。哩本<o>項下，也mo 提到有漢字。<nga>項下，用<阿>來寫<o-nga-e>介<o>， 用<伢>寫<nga>。
4) 手上另外有本客荷字典(SH Schaank編介《 Loeh-Foeng-Dialect》，1897；印尼出版)，ngai 從一位印尼華人買影印本，但mo尋到。

中國介客家辭典手上有三本，盡多年前朋友送ngai介，盡簡單，像m係為客家人來編介。最其中一本張維耿主編介《客家話詞典》(1995；廣東省，廣東人民出版社出版)。也用漢字<啊>來寫<o>字，但用<伢>寫<nga>，但是<伢>項下也有另外一條註解講係<我的>意思。

在網路上客家字典不少，但是有漢字又有發音介
mo多，ngai佇哩只簡單用三網站介資料，其他應當還盡多，不過m係為台灣客家話編介。

1)《漢字字典》(http://www.chineselanguage.org/CCDICT/)中介《客家話音彙Hakka Pronunciation Dictionary 》(http://www.chineselanguage.org/Language/Hakka/Tables/index.html)去尋，<o>發音項下有< 孲>字，<nga>發音項下只有<伢>，mo 上述介<>或<牙>+<子>。
2) 台灣行政院客家委員會(http://www.hakka.gov.tw/)介《四縣腔語言辭典》(http://dictionary.ihakka.net/kaga_flash/)有<孲仔>一詞。
3) 台大客家研究社介《客語小詞典》(http://club.ntu.edu.tw/~hakka/)

有關介<o*>項下去尋，哩網上字典同一頁上<孲>有時讀<o>，有時讀<nga>。抄下來佇腳下列出分(pun/bun；給)大家參考：
(a)饒平腔下列出：國語 : 嬰孩 ；客語 : 阿孲； 音標 : o11 nga53。
(b)大埔腔下列出：國語 : 嬰兒 ；客語 : o nga ；音標 : o11 nga24 。
(c)四縣腔下列出：國語 : 嬰兒 ；客語 : 孲nga24 ；音標 : o11 nga24 ；備註 : nga24寫做「子牙」。 綜合來講<o> 介漢字寫法有：<孲>，<阿>，<啊>。<nga>介寫法有<孲>，<伢>，<牙+子>。同樣介<孲>子，頭擺戰前中國讀做<nga>，現代介台灣、香港lau國際漢字子典讀做<o>，也還有字典讀做<nga>。

從頂高介資料看來，可以清楚看出來，字可以造，音可以變，字典mo一定共樣，時間可以改變讀法寫法。越多人用介字以後就會變做「標準字」。實在講，ngai想<o>可能係本來祖先用介「南蠻」話，故所可能本來就mo漢字，以後介漢字係後人造出來介，m係本來有介「古漢字」，m係所謂介「中原」語言。